Na poin lontan in pti patron lété dann radio é li t’apré ésplik néna kinz mil pti lantropriz lé riskab mète la klé dsou la porte. Mi koné pa si lé vré pou vréman mé zot i domann l’éta pou pèye sak zot i doi. Dann mon kèr, mi di, sirman la pa domin la vèye mé konm i di léspoir i fé viv.

Dopi inn-dé somenn nou l’aprann lopital lé dann difikilté avèk in dète par-la katrovin milyon si i azoute sak li doi la sékirité sossyal. Tanka la sossyété transpor SPl, i paré li ossi li na in trou dan la kèss é anpliské sa inn-dé plinte pou bann dépanss lé pa zistifyé d’apré sak i di.

La zistiss lé sézi é éspéron li va fé son travaye mé li lé riskab d’ète an rodrèssman, avèk in prozé d’plan sossyal bann sindika épi bann travayèr i vé pa. Mi koné pa arien ladan mé d’apré sak mi antan dann toussala sé lo travayèr k’i pé pran lo shok. Alor banna i fé la grèv é zot i atann lo bann résponssab i mète larzan dann po pou rolanss lantropriz.

Mi vé pa dékouraz pèrsone mé sak mwin lé sir larzan lé kourte partou, kissoi dann lo privé, kissoi dann lo piblik, li lé konm la rob fifine é sak i fo fé dann in ka konmsa sé koupe par an-o pou ralonz an-ba mé sa sé pou fé ri la boush é sirman pa pou sov lantropriz.

Romarke azot bien sa sé in léfé pétète l’éta la pou rodé — pars pou lopital i arsanm li lé pou kiékshoz -, konmsa lé possib li aparète konm lo sovèr é demoune lé riskab d’ète kontan oir ali vol o sokour… Sof ké talèr sa lé kapab fé konm in shato d’karte : zot i koné shato d’karte, kan inn i tonm toute i tonm é lo total kapital i sava a la ranvèrs… astèr rode aou kissa lé résponsab, kissa la fé si é kissa la fé la, si néna in malonèkté ladan si na poin. An atandan, konm i di, kabri i manz salade.

A bon antandèr, salu !

Justin