Mézami, l’avé inn foi méssyé Clemenceau, in lansien prézidan d’konsèye La Franss dann lé zané 1914-1918 par la, donk in shèf gouvèrnman lété okipé par la grande guère nout toute la aprann lékol. Méssyé-la téi di, sirman pou kass ti boi, la guère sé in n’afèr tro sèryé pou konfyé sa bande militère. In mo pou rire, Mi pans spa i ri pa avèlk sa.

Mwin pèrsonèlman mi koné pa arien dsi poinn-vizé la. Pou mon par, mwin lé pli atanssionné par lédikassion nassional é fasson k’lé shoze i déroul, mwin noré konm anvi dire, lédikassion bande zanfan sé in n’afèr tro sèryé pou konfyé sa lédikassion nassional... Figuir azot, mwin lété pri dann mon bande réflékssyon san ké ni tète kan toudinkou mwin la ékoute rovi d’la préss é la rankonte rante madame La Réktèze épi in zournalist zoinal de lil.

Mwin la lire sak lété marké é mwin téi éspère la réktèze téi i sava anparl noute lang kréol lékol, méyèr fasson pou fé avanss bande marmaye an kréol épi an franssé, dann la konéssans inivèrsèl épi dann la fasson bande jenn téi sava prépare azot pou ète an bon akor rante zot pèrsonalité, zot kiltir épi lédikassion nassional. Domaze mé mwin la pa trouv sa dann zoinal !

Sèl zafèr mwin la trouvé sé kèl manyèr téi fé pou ratrape lo rotar l’ané 2020-l’ané lo konfineman – é sèye fé de sorte noute bande zanfan i ratrap lo nivo moiyin bande marmaye an Franss… Mi pé dir, sé pa sa la révolission nou téi vé. Normal ! Dann l’OCDE La Franss lé an rotar, alor la pa avèk sak lé an rotar ké ni sava ète an avanss domin.

An touléka sé konmsa ké mi panss. Mi panss pa la métode bande vinki va rande anou vinkèr. i pé torde lo bande shif konm i vé, mé mi oi pa an koué sa v’amenn in bon solission dann lédikassion toute bande zanfan rényoné.