Kisa la invant in bon manièr pou gond la vaniy* : i fé vit, la pa bézoin zoutil konpliké - in sinp zépine l’asé - i réüsi san pour san. In zen zésklav douz an téi apèl Edmond, la trouv sa lané 1841. Lané 1848, moi d’séktanm**, la donn ali lo nom Albius. Li lavé diz-névan. Son momon lé mor kan la akoushé, son papa téi travay dann bitasion mésié Beaumont-Bélier.

Edmond téi suiv son mèt tout koté li sava, dann zardin, pou gond sitrouy. Lo marmay la aprann vit sak lo mèt la amontr ali. Aprésa, li la dépas lo mèt. Kosa li la gagné pou son gran dékouvèrt ? Arien. La anvoy ali amontr lé z’ot koman i fé dan tout bitasion bann blan.

Li la pa gagn la tèr, bann blan lavé an gaspiy. Li la pa gagn in larzan, mem si inn-dé propriétèr la ékri in lèt gouvèrnèr pou li. La fout ali la jol akoz la trap ali dann in vol bijou. Solman la libèr ali avan son tan. Aprésa la pi antann parl dé li, ziskatan li la mor dann in lopital Sint Sizann.

Ala in gran rokonésans*** pou in moun la mèt la Rénion an lèr, la mèt la zénès an lèr !!
Nout zansèt i pé èt fièr d’sak zot la fé.

Justin

*Pour féconder la vanille, il faut mettre en contact l’organe mâle et l’organe femelle, séparés dans la même fleur par une membrane.

***In bann gro blan la sèy vol son linvansion pou zot, di sé zot la trouvé.