Zordi i tèrmine “eG8” dan jardin Tuileries a Paris an Frans. Sé in gran lévènman ou gran di moun lintèrnèt i réuni a zot pou débat si gran zanjeu : révolusyon numérik, lintèrnèt dand fitir. I koz si la régulasyon, koman lité kont sibèrkriminalité, la nétralité di nèt, la fraktir nimérik, limpakt lintèrnét èk nouvél tèknoloji si la kroisans... é dési dot choz ankor.

Na osi gran dimoun, dizon lo gratin — sèl la i manj pa — kom : Éric Schmidt (Google), Vinton Cerf, Jimmy Wales (Wikipedia), Bille Gates, Mark Zuckerberg (Facebook), Rupert Murdoch (News Corp), Jeff Bezos (Amazon)...

Domoun la, la fé èk virtyèl larjan… mé larjan, lé pa virtyèl, lé vré. La i jouyé pan an chort, kom diré in kamarad. La i jouyé dan la kour milyon, milyar. Dizon la kour richar.

Virtyèl lé bon kom pa. Sak lé bon par èksamp, sèrfèr i pé èt an kontakt dirèkt èk zami, zanfan lé apré fé zétud la-ba ; domoun i viv la diktatir i pé transmèt zékri, vidéo, foto pou dénons tou sa — mé apré dirijan i koup la konèksyon, i mèt la jol… —… Sak lé pa bon par èksamp, i fé mové rankont, i pé di nimport kouyé si ou si la toual…

Zordi i parl dé pli an pli rézo sosiyal, son non i vé tou dir. La osi na la monaye an jé.

Kom la été di an débi d’“Oté !”, zordi i fini “eG8”. Apré domin, i débit G8 Deauville an Frans ou gran puysans ékonomik i rankont a zot. Mé avan dé randé-vou la, navé in not in G8 religieux — lindi é mardi Bordo. Zot i di « sèl in partenarya élarji, solidman fondé si préokupasyon komine, i pé èspéré résoud problèm strukturèl posé zordi é si lon tèrm » (2).

 Justin 

1 - À Paris an Frans.
2 - http://www.la-croix.com/Religion/Urbi-Orbi/France/Un-G8-religieux-a-Bordeaux-avant-le-sommet-de-Deauville-_NP_-2011-05-24-618322