Oté, si la tèr la néna d’moun i mank pa toupé. Mi sort lir dann in zournal déor in déklaration lo promié sokrétèr lo parti sosyalis an frans. Kosa li di ? Li lé an shalèr kont lo médèf i prétan, li konsidèr lo médèf i tyinbo pa son parol, li tyinbo pa son promès. Li di i fo bann boug lo médèf i bouz in pé zot palikoun dsi la promès lanbosh. Konm mwin la konpri navé inn ti lantann rantrozot, lo gouvérman la donn larzan lo médèf é an rotour lo médèf té i dwa anbosh in pé d’moun, boudikont lo médèf zordi i fé zorèy koshon dann marmit pwa.

Donkalor, poukoué mi di néna i mank pa toupé ? Ni koné nou lo médèf i ral lo frin, i fé diré, mé kan mi antann in sosialis gaskongn sak i tyinbo pa son promès mwin la anvi réponn a li« fé pa ri a mwin mon lèv lé pété ». A nou minm nou lé abitié nou èk bann promès i tyinbo pa, dopi konbyin dtan nou lé konm sèr ann, ni atann, ni atann minm. Boudikont, lo gouvérman èk lo médèf lé konm lo diton bann vié « Volèr i vol volèr diab i ri ». Kisa i sar krwar a zot ankor ?

Zordi zot lé dann in konkour, sépousa lo promié sokrétèr la fé war son kapab in kou èk lo médèf, zis inn ti néstan, aprésa va rokomans konm avan, mé la zordi, i sazi pou fé war kisa lé pli a gosh lin a lot. Mwa dzwin lo parti sosyalis i tyinbo son kongré, néna i zoué gro, ziska zordi néna kat mosyon i di, kat mosyon roprézanté par kat moun, sépousa ni di néna in konkour rantrozot ziska mwa d’zwin. Méfié a nou èk banna ziska mwa d’zwin ni sar roul a gosh tout, aprésa i kass kontour, ni rotrouv a nou a drwat. Ek banna lé konm sa lé dann zot natir !