Dan nout sosyété rényonèz, nana bonpé kansèr, mé nana inn lé riskab fé prann anou le fon san k’ni méfyé sifizaman, sé lo shomaj. L’èr k’i lé, nana plis san-sinkant-mil shomèr inskri Pol anploi. Sa i vé dir, apopré inn pèrsone dsi dé an az pou travay. I di ni bat lo rokor an parmi tout bann réjyon i fé l’Erop, é la pa inn gloir pou nou. La pa in onèr non pli, zis lo risk in gran l’ésplozyon sosyal.

Poitan, na la plas pou travay La Rényon. Zordi, moin nana in shif dsi la pèsh poison. In misyon la vni La Rényon la di konmsa : in sipozisyon, nout bann péshèr té i trap in pour san lo poison k’i pèsh dan l’oséan Indien. In sipozisyon, i travay poison-la pou fé konsèrv, pou mèt an sirzélé. Kont galman tout sak i pé fé antour so l’aktivité-la... Figuir azot, nana la plas pou fé travay kinz-mil pèrsone. Kinz-mil famiy na moiyin gingn son soso la-dan. Poitan, i fé pa, é nout zénès i arèt san boulo.

Nout zénès anou, nout zénès rényonèz pars m’a dir azot in n’afèr : la Frans, sa in gran péi pou la pèsh. Sa ni koné ! Mé sak ni koné pa, sé ké lo kar bann poison bann bato fransé i pèsh i sort dan l’oséan Indien, donk dan l’oséan i antour anou. Si l’avé avèk nou in bon koopérasyon, kansréti rant bann kopérativ la pèsh la-ba épi sèt isi, l’èr-la nou na tout rézon pou avansé. Mé i fo fèr sak i fo pou done travay Kréol.

Justin