Bann i komans inpé rasi kom mwin, i ansouvyin, in takon famy té mizèr lontan. Mizèr pou dovré. Navé pwin aryin. Navé pwin in kwin éspésial dolo, kom koméla, pou pran lobin, lo swar avan dormi. Té ki bingn déor , kan navé in robiné dolo.

Mwin na souvnans osi, lo moun té ki asiz si péron la kaz, li té lav son pyé dann in kivèt dolo. Dann tan-la, lo moun mizèr, té koné pa kosa i vé dir servyèt. Li té ki suy son pyé ék in vyé linz, té anserv pi. Té apèl sa, shifon lo pyé.

Mé pou dormi, kom koméla dayèr, té ki lav pa sélman lo pyé. Té lav osi in pé lo kor partou, lo figir sirtou. Kom navé in shifon d’pyé, ébin navé osi in shifon pou la figir ! Ek shifon d’pyé, té ki ésuy pa la figir.

So tan-la, lé lwin déryèr nou. Lé lwin rézman so tan, nou té ki antan : « Momon, ousa i lé shifon lo pyé ? Momon, ousa i lé, shifon la figir ! ».

Ek shifon d’pyé, té ki ésuy pa la figir. In pé kom torshon i mélanz pa ék servyét.

Pol