Oté

« Ekout pa in sèl zoizo shanté : ou lé pa pou alé loin konmsa »

In kozman pou la rout

Justin / 4 désanm 2017

JPEG - 43.6 ko

Dann la natir na in bonpé zoizo. Tout i shant mé tout na poin lo mèm shanté. In moino i shant pa konm in martin, parèy pou in tourtrèl épi in mèrl Moris, parèy ankor pou cardinal avèk tèktèk. Mé ni pé dir galman dann in group lo mèm kalité zoizo, la pa tout i shant lo mèm shanson. Sanm pou moin, si ou i pé ékout tout zoizo, sir ké ou i sava pa antann lo mèm kozman, lo mèm bézoin, lo mèm traka, lo mèm kontantman. Astèr la sosyété d’moun lé parèy : si ou i vé konète kosa la éspasé pou vréman, ékout pa in sèl moun mé ékout plizyèr. Komansman, va anbrouye aou, mé lo vré va fini par fé son shomin. Alé ! Mi lèss azot réfléshi la dsi, é ni artrouv pli d’van sipétadyé.