Oté

Ekspate, migran, zémigré. Zot i koné sa zot ? Avèk in bon tizane léféralgan doulèr d’tète i pé pasé

Justin / 4 avril 2017

Mi sort antann in shif dann télé. I paré dopi kék z’ané La Frans la vi troi milyon z’émigré rant dsi son téritoir nasyonal. In n’ot shif lé kant mèm intérésan : pandan lo mèm tan 2 milion sink san mil ékspate la sort la frans pou alé dann d’ot péi.

Mi domann in bon dalon,kosa i lé in ékspate ? Li fé pou répons,sé in ékspatriyé. In moun I sort dann son péi pou alé dann péi in n’ot sé in ékspate.

Mi arpoz ali in n’ot késtyon : donk si mi sort La Syrie pou vni dann l’Anglétèr, moin sé in ékspate. Lé vré lé pa vré ?

Mon dalon i réponn amoin : Avèk lo Brexit bann z’anglé va kal aou é mèm si ou i gingn rantré ou sar pa in ékspate ditou, ou sar in migran é konm i di avan pou gingn papyé konform ou nora pou trimé. Ou va fé briye trottoir afors dor dsi.

Moin nana ankor in késtyon pou pozé é. ala li la : bin, si mi tronp pa pou sort La Rényon pou alé dann La Frans nou la pran la bimidom, é dann bimidom nana lo mo migran . Donk nou té konm k’i diré in moun La Syrie kan li la parti dann l’Anglétèr.

Ala son répons : Kan ou la sort La Rényon, ou la pran l’aviyon é ou la débark dann Orly près konm in blan. Donk ou té pa in migran !

Alors sipozon in n’afèr : si mi sort la Syrie an l’aviyon, konm in blan. Mi ariv l’Anglétèr é mi débark laba touzour konm in blan, moin sé in ékspate sansa moin sé in migran ?

Ala ké li réponn amoin : dann in ka konmsa lo moun sé in migran kostime troi pyès .Ou sé pa in ékspate pars na arienk in l’éropéin k’i pé z’ète in ékspate, in syrien i pé pa, ni in l’afgan, ni in moun La Libye

Ni in rényoné si mi konpran bien ?

A ! In rényoné sé in katapar. Ni rant pa dann in shéma normal. Nou lé atipik, konm l’insee i di. Ni pé z’ète in ékspate si demoun i kroi ni sort l’erop é si ni sava dann in péi étranj, in péi la pa éropéin. Si demoun i pans ni sort pa l’érop ni pé pa z’ète in ékspate.

Donk si mi gingn bien mantir, mi pé z’ète in ékspate ?

arète avèk moin li di amoin ! i gingn pa koz an moun avèk in sovaz konm ou.