Mazine aou in pé :ou la di aèl wi em aèl plis ké tout zafèr, wi èm aèl pou toultan. Ou la di aèl ossi, ou féra pa mal aèl, ou féra pa èl de tor dann out vi. Él la kroir aou , él la fé aou konfians akoz kan wi èm wi fé konfians. Zot dé ansanm, zot la parti rann vizite son bann famiy. Banna l’akèy aou dé bra rouvèr : sèl fiy zot nana épi pou zot èl lavé trouv son bonèr.

In pé apré zot la marié konm i di pou lo méyèr é pou lo pir, mé zot dé téi oi arienk lo méyèr poitan. Lo pir la pa tard arivé, pa toutsuit mé firamézir : la komans par dispité, apré ou la komans tapé : fanm i komann pa lo zonm épi in klak konm kan i koriz marmay.?
Défoi, out papa téi lèv ossi la min dsi out momon. Ou ossi, ou la vouli fé parèy.In klak la amen dé, aprésa koudpoin, koudpié, ou la roul aèl atèr. Apré ou la demann aèl pardon ; ou la di mi féra pi solman ou la rokomansé...Ou la mèt radio for konmsa demoun i antann pa èl kriyé.In moun lé dir sa, i fo tapé,tapé,tapé...ziska èl i rann son dèrnié soupir..

Astèr, wi rogard mèm ménot dann out min, ou lé maléré pou ou-minm ;. Wi trouv wi fé pitié. Wi oi mèm pa èl , out zié lé viré par anndan. Poitan, èl lé zoli dann son sèrkèy !

Justin