Ou la di aèl ou èm aèl pou toultan. Ou la di aèl, mi féra pa ou d’tor, zamé d’la vi. Ou la parti oir son bann famy pou dir ou vé prann aèl konm madam. Alor, banna la rouv lé bra pou akèye aou.

Aprésa zot la marié pou lo méyèr é pou lo pir. Demoun té kontan oir in pti koupl bien komsa. Solman lé shoz la gaté fir-a-mézir. La komans angélé, apré la komans tapé. Kom di lmoun in klak sé pou korizé. In klak la amèn dé, aprésa koudpoin, koudpié, ou la roul aèl atèr. Apré ou la demann pardon ; ou la di mi féra pi solman ou la rokomansé. Ou la mèt radio for pou demoun i antann pa èl kriyé. In moun lé dir sa, i fo tapé,tapé,tapé.

El lé zoli dann son sèrkèy anfléri. Ou la zamé vi aèl zoli komsa. Ou rogard ménot dann out min, ou lé maléré pou ou-minm ; ou trouv ou fé pitié. Donkalor, ou la pa shanjé !

Justin