Kossa i lé konféranss-la ? Sa sé in n’afèr prévu par la loi 2014 pou mète in pé an armoni toute bande politik apliké dsi noute téritoir tèl fasson k’inn i akorde avèk l’ote, sansa lé z’ot zinstitissyon ; tèl fasson k’i siprime in pé bande kontradikssyon si néna.

Aparaman, pou kamarde Élie, sa sré plito in rényon, pa pou aranz bande poinn détaye, mé pou rovoir in pé toute dann l’ansanb… Mi panss lé normal pars si inn i di i fo shanj lozissyèl, é si l’ote i di nou sé in réjyon atipik, é si pou bonpé d’moune nou lé ankor loin d’ fé avanss noute dévlopman, donk i fo armète toute a plate é la dsi mi panss bonpé d’moune lé dakor. I fo romète la boul o sante.

Nou lé dakor pars néna in ta avèk in paké voiyan o rouj donk bonpé problèm pou réglé : lojman ? Lé dann rouj. Lagrikiltir ? Lé dann rouj. Linportassion-lésportassion lé dann rouj. Shomaz lé rouz vif. La santé, I tourn pa ron. Lédikassyonbn ? Néna a rovoir. Ala pou kossa i fo mète lé shoz a plate pars manyèr k’i sava, sanb pou mwin toute i sava an sharète shaviré.

Pou Élie, i fo in konféranss élarji, avèk toute bande fors viv nout péi é pa solman bande zélu. I fo ossi aborde toute bande késtyon ékonomik, sossyal, kiltirèl, anvironemantal donk toute bande séktèr i intérèss nout pèp, jenn konm vyé, roganizé épi non roganizé avèk konm soussi prépar noute péi pou domin, pou apré domin, pou lo syèk nou lé d’dan.

Demoune la diskité, é tan myé la diskité ! Pars sa i vé dir bande fors viv La Rényon néna de koi pou fé valoir é si toulmoune lé dakor sa va amenn anou dann shomin noute vré dévlopman. K’i pass par in loi program dsi kinz vintan é sa lé pa tro long pou tir anou dann malizé.

A bon antandèr, salu !

Justin