Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi domann éskiz, mé mi konpran pa z’ot lozik ! Si i pé dir nana in n’afèr a konprann avèk bann rouj é si i pé parl dé lojik, kan i koz avèk zot. Pou kosa ? Pars moin la bien lir sak zot la ékri dsi la késtyonn bann z’atanta. Lé vré ké zot i parl de bann téroris, konm in bann dé barbar k’i fo ramenn a la rézon. Dakor ! Mé akoz kan in bann gouvèrnman i pran bann désizyon pou sa, zot l’apré ral kont ? Pou moin, konm d’abitid zot i koné pa kosa zot vé. Pli pir pétète zot i di blan, mé zot i pans noir. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, étone pa ou si out prop lozik i bote pa moin. Pou kosa ? Pars kan kékshoz i ariv, i fo bien rogard sak nana avan, sak nana dann lo prézan, é sak lé riskab an avoir dan l’avnir. Pou moin, sé konmsa k’i fo ni rézoné é pa konmsi tou d’in kou l’imanité la pèrd la mémoir.

Daesh i égzis é sé in koshmar pou l’imanité dakor ! I fo élimine ali, dakor ! Mé kisa la détrui lo pouvoir dann l’Irak ? Kisa la fébli lo gouvèrnman La Syrie ? Kisa i soutien in gouvèrnman pouri dann l’afghanistan ? Kisa la détrui lo pouvoir Kadafi ? La répons lé dann l’aktyalité. Kisa k’i ansèrv bann jihadis pou trap lo rézilta ké zot i vé ? Pa yèr ! Zordi ankor ! é pétète domin !

Dann bann lézann La Grèce, nana in n’afèr té i apèl la boit Pandore. Pèrsone i koné pa kosa na la-dan. La di sirtou : « rouv pa boite-la ! ». Poitan désèrtin la rouvèr é aprésa pi d’moiyin pou zigil la katastrof. Mi éspèr sar pa konmsa mé mi pans nou la pankor ariv o-bout bann sirpriz dézagréab. Tok ! Pran sa pou !