Oté

Em out lang kréol ! Em out fransé ! Avèk l’amour pou inn épi l’amour pou l’ot néna lo poin pou nou marké !

Justin / 21 octob 2020

JPEG - 43.6 ko

Matant Zélida la ékri Justin :

Mon shèr nové, mon spèss salté, rouj-do-fon dopi l’étèrnité sanm pou moin zordi zot lé dan la zoi la, ou i doizète kontan vi k’in moun la pass dann télé rényon promyèr pou fé la propagane pou lo patoi kréol La rényon kont lo fransé. Moin lé sir out dosou d’pyé téi dig dig la. Poitan mon névé fransé t’in lang, kréol t’in patoi ! Avèk fransé i pé mark lo poin partou, avèk kréol non lé konmsa é pa otroman. Alé ! Bate si zot i vé dsi galé, konm zot i vé, galé sèk i tir pa d’lo dodan. Tok ! Pran sa pou toi !

Justin la fé pou répons :

Mon vyé matant k’i koz la boush rouvèr, i étone pa moin de ou pou pran lé shoz a tor an travèr konmsa. Mé siouplé matant arète avèk out bann vyé lidé masikrok : Kréol rényoné, sa la pa in patoi mé in lang konm néna plizyèr santène dsi la tèr. Anplis in lang i fé rant anou dann la kiltir épi dann sivilizasyon kréol é sa in kont pou in bonpé d’moun dsi la tèr. Avèk nout lang kréol rényoné, ni gingn mark lo poin nou, fransh é : pou aprann kozé, lir, ékrir, pou kaptir in pé tout konésans néna dsi la tèr, pou fé fonnkèr, rakont zistoi, fé téat, fé roman, fé romans, étidyé nout l’anvironeman, diskite nou filozofi, pou vni sipèrkaloumar dann la roshèch. Alor sa la pa lo poin sa pou nou ? Matant asé avèk out rézoneman an bob la.

In n’ot afèr : ansèrv nout lang kréol rényoné kont lo fransé, kisa la trouv in l’idé lé fo konmsa. Rézone konmsa sé rézone konm in tambour. Di dé shoz konmsa sé trafik la vérité. In bon konsèye pou nout tout rényoné : èm nout lang kréol èm ossi nout fransé aprann bien inn épi aprann bien l’ot. Ala koman nou va mark bonpé lo poin. Tok ! Pran touzour sa pou ou matant épi mète out moushoir par dsi !