Mézami, mi rapèl in provèrb an franssé – si mi tronpe pa – té i di konmsa : sak i vé noiye son shen i di li néna la raz. Sa i vé bien dire sak li vé dire : I fo pa rode in prétèks pou trouv in rézon pou fé in n’afèr – in prétèks pou done aou bone konssyans pou fé in n’afèr k’i fo pa fère.

Poitan sa sé in n’afèr i oi toultan dopi lo monde lé monde é ké l’om la bézoin zénmi pou fé sak li néna pou fé. Sak i gard bande fèyton dann télé i oi souvan sak mi sorte dire… Mwin pèrsonèl mwin lé konte sa, mé mi wa in pé partou i fé konmsa é bien antandi sa i pouri bande rolassion rante moune é moune, parti é parti, péi é péi. Anpliss sa i fini souvan dé foi par la guère.

Mwin lé siréssèrtin, toute demoune va di sa la pa bien, mé bonpé va tonb dann travèr-la. Mi pé zist dir i fo pa fé sa, astère d’ète ékouté sa sé ankor in n’ote afèr-in n’ot père d’mansh : néna loin pou alé dopir la koupe pou ariv bande lèv.

Allé ! Mi kite azot rofléshi la dsi, é ni rotrouv pli d’van. Sipétadyé !

Justin