Goni vid i tyinbo pa d’bout ! Mi pans zot i koné so patoi-la ? Sa i fé pans amoin La Rénion dann tan*, dann tan la finision la guèr karant. Dann tan-la, in pé marmay té i sava l’ékol vant vid. Lo famiy té i gingn pa done azot kansréti in gazonn ri shofé, sansa mayi d’ri, sansa ankor in pé soso. Mèm lanmsime l’avé poin pou done azot. Kan zot té i ariv l’ékol, zot tèt té i komans tourné, zot vant té i gargouy, dé foi mèm zot té riskab gingn féblès. La diréktris l’ékol i koné son bann. Té pou sa mèm èl té i fé mèt kisoi d’ri, kisoi d’mayi an plis. Donk, kan in marmay i ésplinn avèk la métrès l’ékol pou in doulèr d’vant, té i amèn lo marmay dirèk dan la klas la diréktris pou gingn in vèr d’lo d’sèl épi apré in gazon manzé avèk la kantinièz, madam Baba. Aprésa, la maladi té i sava konm par in kou d’maji.

Pou kosa mi parl de sa ? Pars mi sort antann dann télé, koméla dann in péi i apèl Portigal, avèk la kriz, plizanplis marmay l’ékol i ariv l’ékol vant vid. Donk gouvèrnman la vot in l’alokasion, konm sa kan la métrès l’ékol i romark bann ka konm sa, i fé anvoy la kaz la famiy bann frui, bann légime, épi bann séréal, konm sa i gingn amélior manzé lo z’anfan, mèm sèt son famiy, pars sé tout la famiy lé dann bézoin... Ala lo rézilta lo bann bon konsèy la Troïka la trouv konm solision pou la kriz in razaj de pint konm bann Portigé té i koné pi dopi lontan. La-ba i tap a-tor a-travèr, dan bann salèr, dann l’asédik, dann l’arzann lo, ziska dan la rotrèt. Alor, lé pa étonan na d’moun plizanpi pov, lé pa étonan bann famiy na pi do koi pou ranpli lo boujaro zot bann z’anfan.

Ala k’mi lir dann zournal, Madam Christine Lagarde, dirèktris lo FMI, é anplis ké sa èl i fé parti la Troïka, i domann bann péi l’Erop pou èt in pé pli pridan é pou alé pli dousman pou diminié la dèt piblik. Mèm èl i di la Frans alé pli dousman. Bravo !, konm di in politik sélèb té dépité La Rénion, vié motar ké zamé. Mé èl té minis Sarkozy, èl mèm la parti done bann péi l’Erop lé zord. Alor, sanm pou moin, sré préférab demoun konm sa i fèrm in pé zot také. L’érèr lé umène, mé kant mèm !

Justin

NB : Dan la Troïka, na troi pèrsoen : in diréktris lo FMI, l’ot diréktèr la bank l’Erop, é lo dèrnié, sé Baroso, prézidan la Komision éropéenne. Sa i fé mal demoun sa !

Justin