Oté

Éskandal dann la famiy !

Justin / 23 zwiyé 2018

JPEG - 43.6 ko

Mi pans zot la antann konm moin sak la spass dann Pari laba, promyé mé kan in nèrvis, gard-kor lo prézidan la mète in kask la polis dsi li épi la matrak demoun dann shomin, dovan bann Séèrès. L’afèr la paf é tro lo brui ziska inn-dé zour d’sa. Pa vi pa pri, lé zom lo prézidan épi lo prézidan li mèm, la pans té i fo pa romyé la salté. I koné pa sa ! Si la bone shans lo prézidan i pèrmète ali évite in éskandal.

Si ! Moin la bien di si. Pars l’éskandal lété déza dan la boite-demoun l’avé fime lo zafèr avèk z’ot téléfone. La polis osi l’av éfime l’afèr é zot l’avé fine fé konète sa z’ot sipèryèr. D’apré sak i di l’élizé osi téi koné sa : la prèv a konviksyon lo résponsab lo nèrvis l’avé mète ali a pyé kinz zour. Mé oila, mèm sa téi anpèsh pa o prézidan bate karé an vélo avèk on nèrvis, mèm téi falé oir kan bann zouar fotbal l’ariv Pari, li lété absoliman konm in shèf an tète.

Romark azot bien, nou isi La Rényon sa sé in n’afèr lé pa fé pou étone anou. Kosa mi vé dir par la ? Sinploman kan la fé zéléksyon Sintandré-néna in bonpé d’tan bien sir ! Lo gran shèf la polis téi vien vizit son troup san obliy sèr la pins lo résponsab bann nèrvis, lé mor koméla. Sa la spass dann la pèryod noir nout listoirvintyèm syèkl-l dann la péryod la diktatir kolonyal nout zournal la rakonté zour pou zour dsi plizyèr duizène l’ané.

Dann tan-la l’avé poin téléfone portab épi La Rényon lé pa konm La Frans kan i ariv in n’afèr konmsa laba in éskandal soidizan toufé i arpète gran zour. An atandan, konm Sacha Distèl téi shant : éskandal dann la famiy mé na poinn rapor avèk sak lo shantèr téi rakont.