Lavé pwin bozwin èt in gran dovinèr pou konèt kisa i sar èt prézidan d’rézyon, konm prévi, dopi yèr la drwat i fanfaronn èk lo nouvo prézidan, in lansyin nouvo prézidan vik sé lo minm. Minm si sé in larashkèr pou désertin, la drwat i pran son rovansh konm i di, li lé mazoritèr la ba départman, li lé mazoritèr konsèy rézyonal, li lé mazoritèr dann in bon pé kominn. Kissa po pran la tèt lo konba vik lo malizé lé par dovan nou.

Néna i di 180 000 shomèr, néna i di 136000, minm si néna aryink 136000 koman ni sar fé ? Koman ni sar réponn ? Mwin la vi dann télé, pou in rokritman 30 moun, lavé in takon kandida, pou sa zot la fé “in job dating“ in mo la kouyonis byin sir konm touzour pou kouyonn a nou. Ala sak i propoz nout zénéss ? D’si la késtyon travay mwin la pa tro antandi lo prézidan d’rézyon kan li la fé son diskour politik zénéral.

Ni koné kossa i lé son prozé, son prozé sé lo minm dopi 2010 li di, li anshèv fé konm dopi 2010. Byin sir sa in sityasyon i satisfé pa nou. Kisa i sar èt viktim tousala sinonsa bann travayèr, sinonsa bann moun viktim lo shomaz, bann moun prékèr, bann moun néna problinm la kaz. Sanm pou mwin pliské zamé, ni dwa èt la pou lo konba, minm ni dwa èt la pou pran la tèt lo konba !