Matant Zélida la ékrir Justin :

Mon shèr nové, mon spèss salté, rouj-de-fon dovan létèrnité, si mi konpran azot bien, talèr demoun i sava armanz patate avèk la po-la. Pou kossa mi di sa ? Pars opliss i sava, opliss lorguèye i pran dsi in pé é zot i fini par dir ni pé z’ète indépandan dsi la késtyonn manzé. La nou lé pa kontan nou la : magazin lé plin, avèk tout sort de shoz, larzan i sort La franss épi i tonm dirèk dann nout porte-moné.Sa lé pa bon sa pou in pé :zot i kalkil an triman domin zot va ranpli zot boujaron bien konm k’i fo. Alé ! Fyé touzour, mé konte pa dsi, lo tan domin v ’arivé, mé li va arsanm drolman lo tan iyèr si i kontinyé konmsa.Tok ! Pran sa pou toi !

Justin la fé pou réponss :

Mon vyé matante k’i koz toultan la boush rouvèr,sak ou l’apré di néna arienk ou mèm pou tienbo kayé èk sa pars d’apré ou-la, na poinn moun souvan dé foi lo vant lé vide sansa kaziman.Lé vré toulmoun i gingn larzan, kissoi bonpé kissoi trépé, mé sak i gingn bonpé ni anparl pa,mé sak i gingn ti pé :bann pov, ébin sa i fo anparlé. Sak la fin di moi i tonm avan lo kinz sa i fo anparlé. Sak lé blijé alé domann siouplé bann zassosyasion sète-la i fo anparlé.
Arzout èk sa kantité fanm, zanfan, vyé moun, souvan dé foi lé inpossib azot zoinn lé dé boute par l’milyé. Poitan kan i rogard zot kart d’idantité i oi lé marké franssé dossi, mé lo droi oussa i lé ? Déyèr la kart,mé sète-la i kont pa. Alor plito ké fé bate out lang konmsa, si wi désidé prann in kou out résponsabilité.Si toulmoun i désidé prann in pé zot résponsabilité. Eté résponsab de nou mèm, mi oi sa lé bien mwin.Tok ! Pran sa pou ou !