Samdi pasé, moin la trouv in dalon. Lo ga té kaziman an kolèr. Pou kosa d’apré zot ? Pars, sanm pou li, nout bann z’advèrsèr yèr té apré kapar nout program, konmsa demoun i kroi sé zot la gingn, an promyé, l’idé pou fé in n’afèr konmsa. Konm moin té in pé étoné, li la arvir amoin :" Ou i lir pa bann zournal la droit, ou i ékout pa radyo ? Ou i gard pa télé don ? "Aprésa li di amoin, si moin l’avé in pé plis la kiryozité moin nora antann koméla La Réjyon i fé lo bob pou l’idantité Rényonèz, pou lo maloya, épi pou dévlopman dirab. Mèm lénèrji volkan, astèr sé l’EDF ki vé kapar sa pou li, alé oir sé la Réjyon dann tan Paul Vergès l’avé komans sa. Ala ké li di amoin, si i fé konmsa, talèr nou nora pi d’program é tout demoun va suiv la droit épi donn ali rézon.

Pou mon par, mi di ali la pa in n’afèr pou trakas amoin tro, pars dopi lontan mi kroi kan ni batay sé pou in bon program pou bann Rényoné. Alon fé in sipozisyon : si na d’ot ké nout Parti, i vé aplik program nout Parti, bin mi pans moin va bate la min épi mi kroi nou va alyansé èk parti-la. Mé solman, si i pran nout langaz épi i aplik pa vréman in bon program, sé nou k’i doi dénons zot komédi, zot émitasyon, zot fé sanblan. Pars, sak lé sir, sé ké aparaman zot i apiy pa dsi lo mèm klas demoun ké nou. Si banna la fé l’ané 2010, l’ané 2011 épi 2012 konplo pou anpèsh anou fé aplik nout program, sré étonan, zordi, banna i vé lo program zot té i vé pa l’otrozour. Alon oir inn-dé légzanp : si bann nouvo partizan dévlopman dirab i vé pi k’i fé vnir sharbon pou lo dé santral bagass-sharbon, sré étonan bann profitèr dan so lopérasyon i bate la min kan va di azot i fo k’i bril pi sharbon, mé la byomas pou fé kouran. Si banna i di, alon arète èk pétrol alon marsjh avèk kouran pou loto, kamiyon, lo kar, sré étonan bann pétrolyé i di zot lé dakor. Si banna i di, alon transport bann marshandiz par lo trin, zot i kroi bann kamyonèr va bate la min ? A moins ké zot na in tour dann zot bobèsh.

Konm di la Bib, i fo ni fé la par rant lo bon grin épi l’ivraie, lo vré èk lo fo, l’intéré nout pèp é sète bann profitèr kolonyal. Ala pou kosa, ni doi ète vizilan, pou anpèsh k’i roul anou dan la farine.

Justin