Zot i koné dépi lo promyé zour moi d’oktob, si ou na in n’afèr d’loi dovan in tribinal i fo ou i pèy in taks trann-sink éro. La pa dan tout z’afèr : si sé in n’afèr dann la zistis pénal ou na poin arien pou péyé. La pa tout demoun va péyé sirtou si lé dann in gran lokisité. Pou kosa i fé pèy sa ? Pa pou lo bann prosé ou i sava pèy lo taks pou vréman, mé pou la gard-a-vi. Pou lo droi an avoir in l’avoka, vin-kat dsi vinn-kat... Donk si ou na in késtyonn tèr, in késtyonn travay, in problèm famiy... i fo ou i pèy lo trann-sink éro.

Ala sak lo prézidan di pouvoir d’asha la nya bou fèr, apré tout bann taks li la fine mète dépi demoun la mète ali an-lèr. In tan, moin té i antann dir li la fine fé plis trant taks, zordi sépa konbien la fine arivé.

Pou kosa sa d’apré zot ? Sanm pou moin, vik avèk boukliyé fiskal i tir moins larzan dan la posh bann rish, i fo tir plis dan la posh toullmoun. Dézyèm z’afèr, d’apré moin, lo boug nana plito, lo zyé dsi sak i fé dann péi étranz plito ké dann son prop péi. Zot i koné, dann in pé péi ladministrasyon tout z’afèr lé péyant ziska dèrnyé pti bout papyé. Donk, soidizan pou modèrniz l’administrasyon lo ga i vé fé konm dann bann péi-la.

L’èr-la, nana ankor in bon pé z’afèr lé gratuit dann La Frans… alor, jène pa ou la p’assé, mète ankor. Fé pèy anou tout ; taksé, taksé, é rotaksé. Mi pans demoun sar kontan avèk ou... solman étone pa si i done aou out konjé in sèrtin zour lo moi d’mé.

Justin