Mé zami, zot i koné a partir la fin d’moi métro-éksprèss lil Maurice. L’èrla li komans fé laktyalité shé nout voizine : normal ! Pars sé in projé i romant a plizyèr z’ané k’i avans é k’i sava donn bann morisien in nouvo moiyinn transpor pou évite in pé l’anboutéyaz… Moin la antann nora dan lé z’apépré trant mil pèrsone pou pran métro-la shak zour.

Biensir in pé isi La Rényon va di transpor-la si sa lé bon pou Moris, pa forsé k’li lé bon pou La Rényon pars isi sé in départman-réjyon é laba sé in péi indépandan. Pars laba dann lil Moris demoun lé pli mizèr ké shé nou. Anfin pou désèrtin sé inn bone shoz pou nout voizine mé pa forséman pou nou. Mi pans sa sé in bann moune la vote kont Paul Vergès l’ané 2010 épi la bate la min kan Didier Robert la siprime lo projé.
Romark in bonpé dann téléfone téi rokoné sa noré té in bone shoz pou nou osi pou évite pèrd lo tan dann in kok loto é pou konète lèr ou i sava épi lèr ou i ariv landroi ou i vé alé. An touléka demoun téi pans bann morisien néna inn bone shans a avoir sa dsi zot téritoir é donk zot lé an avans dsi nou alé oir nou noré pi ète an avans par rapor a zot. Tout fason lo problèm lé pa la, sé tou sinploman an avoir lo trin pou garanti anou kont lo koma sirkilatoire.

Zordi nou l’apré kozé pou roprann lo projé d’trin avèk in pti rikiki va sort la Mare pou ariv Sin-Dni é in n’ot rikiki pou sort sin-Lui épi alé Sin-Pyèr. Zordi nou lé a d’mandé si in zour va fini la rout an mèr é si i fini koman li sar oboudikont. Sé l’èr Didier Robert i vé kite la réjyon pou asiz dann fotèye lo mèr Sin-Dni, é lo mèr Sin-dni pétète i rèv kite son fotèye pou alé dann sète prézidan d’réjyon. A ! si lo ridikil té ki tyé, noré kaziman in lékatonm isi shé nou.
An touléka, nou lé an rotar é pa arienk la dsi, mé pli grav nou la rate lokazyon ni artrouv ar pa koméla. Etone pa si bann morisien i gaskone plizanplis bann bourboné !