Mé zami, néna pwin lontan mwin la vi dann télé, dë jenn jan-inn lé italien, l’ote lé rényoné – si mi tronp pa…ébin lo dé pèrsone la déside fé fromaz issi La Rényon é pa ninport ékèl mé la Mozarella, in fromaz tipik i fé dann litali, normalman, épi i fé lésportasyon dann toute péi dsi la tèr. Sé konmsa k’li ariv issi dann komèrs.
Binsir mwin lé pour a kondisyon k’i fé in bon produi é ké produi-la lé pa tro shèr, konmsa bann ti kolon lé pa privé. Arzout èk sa banna la di i sava ansèrv bann produi La Rényon pou donn lo fromaz in kashé rényoné - kréoliz ali in pé, si zot i vé.

Mé o fète, pou kossa mi anparl azot de sa ? Pars mwin la parti dann gran sirfass pou ashté in boute pou gouté é dann gran sirfass la répond amwin in drol zafèr : la di, na pwin pou l’instan, mé la komand in konténèr fromaz avèk la mozarella an parmi. Kan mwin la antann sa mové pansé la pass dann mon tète. Pou koué ?
Pars konm i fé fromaz-la La Rényon, la pa bézwin fé vni an konténèr. Si i fé vni par konténèr néna pwin in mov é lintansyon ladan ? Sré pa apré ésèye koul lo lantropriz, tyé ali dann zèf ? Néna in dalon la di amwin i fo pa panss zafèr konmsa, parss lo dé dalon La Rényon i vand méyèr marsh ké lo linportasyon.. Mé mwin la panss toutsuite dumping-in téknik pou vand a pèrte épi kass lo rin lo nouvo dsu lo marshé é apré i romonte lo pri.

Mi éspèr sak mi majine i ariv ar pa. Mi éspèr lé dë dalon va gingn amenn zot bark bien konm k’i fo. Mi éspèr, mé mi méfyé pars nout prodiksyon intèryèr la fine tro gingn lo kou avèk linportasyon dann nout sistèm néokolonyal. Mi éspèr la pwin zanguy sou rosh.