D’apré sak i di sa in kozman demoun La Guadloup solman sanm pou moin sa in kozman i pé intérès in pé tout demoun dann tout péi. Pou kosa mi di sa ? Pars konm zot i koné bann bononm lé mizojine-in pé lé riskab parl rasism antifanm… Donk zot i yèm bien tir défo dsi bann fanm. Lé vré sak mi di la ! Mé oplis i sava, oplis bann santiman bann bononm i prète sa bann fanm, zot osi zot i gingn lo mèm viris. Lé normal pars otan lo momon i fé lédikasyon son bann fiy, otan li fé l’édikasyon son bann garson d’apré son prop santiman ali. Son garson li va di : i fo ou i gingn in bon boulo sansa out fam va mète trin-onz. Son fiy èl va dir : i fo ou néna in bon boulo pou pa z’ète sou la koup in bononm (di andsou : konm moin lété sou la koup out papa !). Alé ! Mi kite azot rofléshi la dsi é ni artrouv pli d’van. Sipétadyé !