Koméla domoun i di : la"lang kréol La Rénion". Bann moun kalifié i étïdié listoir nout péi. Na pi pèr di " lo pèp rénioné". Lïniversité i amontr kréol. D’ot shoz ankor : lésklavaz sé in krime kont lümanité. Astèr maloya i pas dann télé, domoun i vien asis in kabar otreman k’en misouk. Astèr in pë i rod zot vié zansèt, kisa lété, koman téi apèl. Domoun i rod zot rasine, konmsa lé bien fishé dan la tèr. Vin désanm, zour labolision lésklavaz, i fé la fèt. Dann tan lavé in parlé kréol, in patoi "sympathique", navé poin listoir La Rénion akoz navé poin n’ pèp rénioné. Lavé mem in"parti socialiste, ile de la Réunion"-tan-la, té i bat pa si léstoma konm zordi . Lésklavaz, sa dann tan solèy glasé ; épi lété pa si tan tèlman dir : madam Desbassyns, domoun té i kri pa èl, la divine providans bann zésklav. Maloya,kabar, kosa i lé sa ? Sa bann kaf dann bitasion kan laté fine boir frangourin**. Nout rasine ? Zot i vé dir, la Bretagne, sansa bann landroi bien onèt konmsa.Lo pti pé d’san i sort lé z’ot landroi, la fine détinn. Vin désanm ? Kosa larivé zour-la ? la fèt létshi, ? la fèt frèr Scubillon ?
Alon rash bann fèy initil dan nout pasé,don !
Dann kèl tan sa:tan lantikité, tan zézikri té i marsh katpat,tan li té gard-shanpèt, tan la marine-a-voil, tan babèz-asiz***,tan manz patat avèk la po, tan na pli lontan k’lontan ? Kroi pa sa ! na ankor in bon pé d’moun la konèt tan-la.Na inn-dé kamarad la parti la jol akoz zot la zoué maloya sü la plaz Sin-Zil. Parl pi bann vié zansèt, la polis téi ramas azot vin désanm granmatin, té ki larg azot lo soir konmsa. La té sïr zot té i fé pa dézord. Dopï lo tan Doktèr Vergès la plant in pièdboi la liberté,barashoi, lané 1945, ziska zordï, la fine fé in bout shomin mé nana ankor,pou trimé, avan n’ trap la limièr... Bann gatèr i mank pa, lé an gaspiy ! solman pou défrishé, si nou na poin katèrpilar, nou na ankor fangok avèk gran kouto.

Justin

*la grat èk lo sabr **jus de canne fermenté. *** voir le dictionnaire des expressions créoles de Daniel Honoré(UDIR -2002)