Oté

« Fanm l’asiz dsu son larzan ! »

In kozman pou la rout

Justin / 27 out 2019

JPEG - 43.6 ko

Mésyé, médam, la sosyété, zot i koné larzan-la sa i vien i sava sa. Kan ou i kroi li ariv, sé l’èr li la fine mète dovan. Kan ou i pans ou néna ankor sé l’èr ou na pi. Antouléka, sak mi koné sé ké li fé mové ménaz avèk lo plézir, la dépans, épi lo yèm parète. Parl pi si in zoli madam la désid asiz dann out larzan. Asiz ? Sa i vé dir, li vien pou dépansé. Konbien foi, ou, moin, li, l’ot la antann zistoir métrèss-la. Konbien foi, moin, ou, li, zot la antann in moun rish son fortine la dégringolé. Défoi, momandoné, ou i oi in n’ot moun konm si li néna lo pourkoi, dizon konm la poul i ponn zèf an or, épi toudinkou : Patatras, ala lo larzan I fonn konm la glas dsi galé dann solèye. Normalman dann in ka konmsa ou i rotrouv aou tousèl : pi zami, pi d’frékantasyon.I di pa : boug oki na pi frékantasyon ? Alé ! Mi kite azot rofléshi la dsi é ni artrouv pli d’van. Sipétadyé !
Nb –Moin la di fanm i asiz dsi larzan, mé défoi lo zonm osi i asiz dsi larzan fanm é kroi amoin zot lé pa égzan.