Vantredi soir, mésyé Didier Robert avèk son bann dalon la fé in gran rényon dann la sal Candin konm lo Jir i di sé pou sèy fé ardémar son kanpagn. Sa lé méshan konm kozman pars sa i vé dir lo kanpagn la fine kalé, osinonsa i patine in pé. Sa na oir pli dvan, mé alon anparl lo rényon li la fé vantredi soir.

Alon pa parl bann kozman la boush rouvèr bann moun la droit la doné ; alon anparl solman lo nonm de moun dann la sal. Konbienn moun l’avé ? Dann Zinfo 974, i anons kat mil pèrsone, in zournalis télé la kont 2500 pèrsone d’apré lo roganizatèr, lo zournalis Le quotidien la trouv mil pèrsone. Zot i oi la pa ditou lo mèm shif an pasan d’inn a l’ot. Alon komans par tras in kroi dsi lo kat mil pèrsone pars konm di lo kont sé la voi d’son mèt.

Konbien d’moun i rant dann la sal la ? Mi souvien, moin la fine alé dann sal-la pou bann gran-gran rényon, mèm in kongré ébin si i rant mil la bien rantré, pars mi souvien avèk mil demoun lé tasé konm sardine… Donk si pou rolans in kanpagn i fo komans par lans la mansonzri, ébin ni pé dir la parti lé pa gagné d’avans.

Moin na in l’idé. Li lé vyé konm lo mond. Kosa i fo fé ? I sifi kont lo nonm la pate épi diviz par dé. Ala in bon l’idé pou d’bon.