Mi koné pa si zot la gingn l’okazyon, in zour, oir in moun tyé in gro zanimo, in bèl bèf, manyèr lontan. Moin oui ! Dann tan-la moin té i pran lo tan pou oir lé shoz épi an mèm tan pou sèye dékode mon bann l’inprésyon, mon bann santiman kontradiktoir. In bèf sa lé kosto, sa i dégaz in fors inkroiyab mé in moun adroi avèk in kouto la lam lé pa pli gran k’in min piké rant lé dé korn [1], in pti pé an aryèr i fé tonm atèr lo bèl zanimo, i ramenn son fors a zéro. Li lé pa mor ankor mé konm k’i diré tout son komann lo nèrf, lo misk, mèm son l’ékilib lé mor pou vréman-konm i di, kan i fé la guèr, lo sant komanman lé détrui. Aprésa i pik in gran kouto, sanm pou moin dann kèr, mé sa mi èm pa anparlé pars fransh vérité, sa i glas mon san… Dann tousala, kèl loson i pé tir dann in kozman konmsa ? Sé ké in l’advèrsèr, for konm li vé, for konm li pé, nana in poin fèb é si ou i trouv poin fèb-la é si ou i gingn atak ali l’androi-la sé ou k’i gingn é sé li k’i pèrd. Mi lès azot fatig z’ot koko la dsi é ni artrouv pli d’van sipétadyé.