Matant Zélida la ékrir Justin :

Mon shèr nové, mon spès salté,

A bon ! Aforstan, bann rouj-de-fon la pas zot tan pou malparl bann sosyalis, ala éstèr zot i domann vote pou in sosyalis dann sak i apèl bann "primèr". I fo kroir zot la bien pèr lo pti prézidan Sarko pou fé in l’érézi konmsa. Lé vré, mi koné pa kèl péshé, solon zot, bann sosyalis na poin. Banna la kass l’inyon la gosh épi la fé bate lo patriarsh dann zéléksyon réjyonal. Banna la rofiz lo tram-train épi la Mézon sivilizasyon. Avansa ankor banna la profèr fé vote pou la droit, plito ké mète in kominis anlèr. Pli pir, zot pli gro roprosh, parti demoun i di, sosyalis la touzour vouli afayir lo Parti Kominis Rényoné, kraz ali konm la kraz Parti Kominis Fransé. Di pa moin non ! Pars moin osi mi lir zournal, moin osi mi ékout sak demoun i di. É sak mi di a-ou, moin la fine lir, moin la fine tandi dann radyo... Vi koné, mon nové, nana in léksprésyon pou di sa dann kréol rényoné. Sa i apèl "armanz son vomi". Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Pou komansé, mi konplimant aou pou out patoi si plin la délikatès. Moin té i atann pa moins de ou... Solman, mi pans nou la pa dsi lo mèm longuèr d’onn. Pars, lé vré ni vé fé bate Sarkozy. La pa akoz li sé Sarkozy, mé pars li la aral anou bien an aryèr dépi li la pran pouvoir épi èk son préfé, èk son parti IMP, son bann kamyonèr, son bann radyo o-zord, épi tout son l’aparèy, li la nyabou fé kas in bonpé projé té i doi amène in pé plis progré la Rényon. Olèrk mète anou konmsa dann malizé !

Astèr, sak ou i di dsi lo Parti sosyalis, lé vré, sa lé sir, mé kont dsi nou pou trouv lo bon tik-tak k’i fo pou défann anou par nou mèm. Dépi 1981, nou la nyabou fè sa, é bin kont dsi nou pou kontinyé. Pou koué d’apré ou ? Pa pou in sinp zimnastik la politik, mé sirtou pou fé avans la koz lo pèp rényoné.

Justin