Na dé foi mi antann dann radio demoun i téléfone, kisoi pou di zot lé kontan, sansa pou dir zot lé pa kontan, sansa ankor sinploman pou rakont in n’afèr la spasé é zot i gingn pa gard sa dsi z’ot kèr. Pa toultan mé i ariv ké toudinkou zot i di zot i sava koz kréol épi zot i anvoy in bordé kozman kri...

L’èr-la, sa in n’afèr i shagrine amoin in pé pars dann kréol rényoné-konm dann tout lang !- i pé z’ète insolan mé i pé z’ète osi bien poli, bien rafiné. Lo kozman moin la mark an-o-la, sé in kozman bien poli. Fé bien konpliman out madam : ala kékshoz bien onète ! Lo moun k’i di sa i vé z’ète zantiy avèk la pèrsone. Sé in prèv dé sak moin l’apré ékri.

Kosa zot i anpans ? Arien ditou ! Fé travay z’ot koko ! Fé bouye z’ot martyèr griz ! Zot va oir ké rant-rant ni pé z’ète tazantan dakor rantre nou.