Médame, Méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo vré masson. Mézami mi panss noute toute i koné lo fab La fontaine, lo korbo épi lo ronar. In pé i doi konète galman lo fab la soss kréol « Papang avèk lo shate » – I paré lo père Ozoux la ékri fab-la. Inn é l’ote sé lo meme zafère, listoir in malin i roul in linbéssil dan la farine. Néna toute kalité malin dsi la tère bande pti é bande gran malin, é an mèm tan toute kalité zinbéssil pti konm gran : néna mèm i pé i prétan zot i dékrosh la line avèk lé dan. Band négosyassion, é ronégossiasion lo zakor Matignon l’amontr anou d’in koté avèk Paul Vergès in moune pridan in pé madré galman téi koné lé konsékanss sak li té apré fé é in jenn prézidan la vni apré é la pran pou nou lo risk in dépassman d’bidzé va pèze dsi nou épi noute zanfan é pti zanfan. Alé ! mi kite azot rofléshi la dsi é ni artrouv pli d’van. Sipétadyé.

Nb Dann promyé zakor Matignon té marké noir dsi blan l’éta va pran an konte pou son par lo dépassman d’bidzé. Dann dézyèm zakor bande gran négossian la obliye marké.