In kozman pou la route

« Fé kroir sé in métyé ! »

1 désanm 2023, sanm Justin

Médam zé méssyé, la sossyété, koz èk mwin sé koz èk in kouyon, mé sé opyé d’lo mir k’i oi lo masson.

Mézami kozman mwin la marke an-o la i pé di, sa in kozman l’aktyalité pars ni pé dir néna léspéssyalis ladan. Sansa koman toute sak ni koné nora arivé ?

Kissa i pé kroir lo pti Vietnam avèk son pti bato la provok lo gran l’Amérik... poitan la guèr l’arivé par sa é bann média la anparl sa san alé kontrolé pou vréman. Kissa téi kroi Sadam hussein l’avé in karguézon bonb atomik ? Poitan gro mansonz-la la parti ziska l’assanblé zénéral l’onu, é aprésa la fé la guèr pou élimine lo Sadam hussein, mé la pa trouv insèl bonb atomik... Ziska zordi.

Ni pé di ankor kissa téi kroi Parti kominis téi domande pa lotonomi mé l’indépandanss ? Poitan ala in manssonz lété fabriké, fané, si tèlman in pé téi pran sa pou la vérité é kissa la dil’avé poinn moune an pèrmananss dann péi Chagos, in gro mansonz la parti ziska l’onu é bann gran péi la fé sanblan kroir.

Sé pou sa mi di, fé kroir sé in métyé é sa i vé dir mantèr sé galman in métyé mé pou bien mantir i fo ou néna la lozistik lo manssonz é in pé néna, d’ote na poin é sé sak néna k’i gingn an final de konte.

Alé ! Mi kite azot rofléshi la dsi é ni rotrouv pli d’van, sipétadyé.

Justin

Padport

Signaler un contenu

Inn modékri, inn ti lavi, inn komantèr ?