Mi souvien, dann tan lontan, demoun té i rès dan bann propriété té i doi fé l’antrotien lo shomin. Dizon, pa vréman l’antrotien, mé kan mové tan té i ariv, té i fé dalo an travèr d’shomin, konm sa le lo i ravine pa tro shomin. Donk, apré lo gro plui, té i aplati lo dalo, konm sa apré sharèt i gingn sirkilé. Dan d’ot l’androi, té i koup bann gro bransh, konm sa lé pa riskab tonm dsi out toi. I fo dir, dann tan-la, demoun té i gnor pa zot té fèb par rapor la natir. Koméla, nou lé touzour fèb, mé i diré nou la fine oublié.

Pou kosa mi di sa ? Pars shak ané na in sézon i pé an avoir siklone, é in sézon nou lé près sir na poin. Donk, avan la sézon siklone, sré normal ni prépar anou pou la sézon siklone. Kosa ni pé fèr ? Par égzanp, koup bann bransh pou k’i tonm pa dsi lo fil l’éstrésité. Kosa i pé fé ankor ? I fé pas katèrpilar dan bann ravine. Sa i pèrmèt évit dézagréman. Nana dé shoz k’i pé fèr kan ou sé in partikilié, nana dé shoz ou i pé fèr kan ou sé in l’administrasion. Mé moin na poin l’inprésion, avan la sézon siklone 2012-2013, in pé partou la pa fé lo nésésèr. Pars sansa, koman i pé ésplik, avèk in z’anfann siklone, la rout té ankonbré in pé partou ?

An plis ké sa, bann z’administrasion la fé inn-dé z’instalasion provizoir é la priyèr Bondié konm sa mové tan i ariv pa. Agard azot in pé koman i fé radié la rivièr Sint-Étienne, sansa radié lo Waki. I diré i fé sa arienk pou k’i kas, é la natir i koné bien sa, é èl i fons dodan konm in mové bèf épi i bouskil lo z’afèr. Aprésa, lo moun lé anuiyé. Sin-Zil la-ba, la désid fé in dig provizoir, mé la prévni lé posib i tien pa. Bravo pou la sinsérité, mé pa pou lo shoi zot la fé.

Astèr, mi konpran bien, in pé i anvoy lé shoz konm l’arivé épi i souèt i ariv pa dézagréman. Mé mank de po, nout natir lé trèt é i fo pa fé ali konfians. Ou sinonsa, di out priyèr, alime la bouji, bril kanf sansa fé konfians out karma. Ziskatan la shans i lès aou tonbé.

Justin