Lo zèr siplémantèr ? La plipar d’tan, issi, i apèl sa solman “fé lé z’èr”. Ou travay an plis kan out patron la bézoin. Pou li, pa pou ou.
Tout moiyin lé bon pou fé fèr aou lé z’èr kisoi dsi shantié, kisoi dann transpor, dann komèrs li, nétoiy biro, li. Kant out larzan lo moi l’arivé, ou rogard, ou rogard, ou rogard mèm out kont larzan : la poin in grin an plis. Lé z’èr ? La pass sou out né ! Ou réklame ? Ay-ay-ay, dézord dann park kanar !
Bien sir, dann bann gran lantropriz, ousa sindika lé in pé for, i fé pa konmsa, akoz la-ba, i fé pa travay zouvrié pou la po patat. Parèy ousa na riyink bann moun sipèr-kalifyé i travay an dalon..
Nana in pé, plito k’péyé, i rékipèr lé z’èr : in pti konzé a la vol, sansa in larg travay pli bonèr kan k’i gingn. Pou la késtion n’larzan, ou’a guèt dan in trou : la poin po ou.
Alors, travay plis pou gingn plis ? Moin na doutans. Fé lo z’èr, oui ! mé la pa avèk sa ou’a zoinn lé dé bout par l’milié.

Justin