Oté

« Fé léshanj damjane pou boutèye »

In kozman pou la route

Justin / 28 avril 2021

JPEG - 43.6 ko

Mézami, mi panss zot i koné kozman-la : par l’fète sa i vé dire wi pèrde dan léshanj. Sa i rapèl amwin in zistoir l’ariv dann mon vilaz.L’avé in foi in boug l’avé in vyé kamion, pé s’fèr pars l’avé poin lantrotien k’i fo, pétète pars li l’avé tonb dsi in mové séri. Antouléka kamiyon-la téi fatig ali : toultan an pane, toultan dan la min mékanisien. Si tèlman k’in zour dovan la boutik Mong-Hune li la lèss in drol kozman shapé : Si i fo, li di, li shanjré son kamiyon kone in koshon. In domi-plézantri di avèk sèryé ; mé la pa tonb dann zorèye in sour é in boug té la, la di ali, li lé dakor - i fo dir lo boug l’avé in zoli koshon paré pou pass kouto dann kolé. Donk ala l’afèr d’fé é li amenn lo koshon son kaz. Son madam i oi ali arivé épi i domand ali kossa li fé avèk zanimo-la. Li réponde li a fé léshanj. Baba ! son fanm la agoniz ali, la donn ali la kantité, la di va mète ali déor, si tèlman li la fini par rononss sa bone afèr : li la rand lo koshon…mé li la lèss lo kamiyon manz zèrb é li la pi toushé. Alé ! Mi kite azot roféshi la dsi é ni artrouv pli d’van. Sipétadyé.