Moin lavé in vié kamarad Boid’nèf, in gasknèr vèy pa. Zordi li lé fine alé la-o, solman mi ansouvien in nafèr li téi rakont dann tan li lété an vi. Li té di konm sa : « Moin la parti bazar Sinni, moin la vi in mashine téi sort la Russie. I mète troi vié dodan, i sort dé jèn. Moin la véyé, véyé mèm pou konprann son tik-tak, pou konète par kèl koté i fo ou i mète aou pou arsort jèn. Moin la pa trouv lo sékré, alor moin la préfèr alé, dé foi k’mi rès dann mashine-la, épi i tir piès déssi moin pou rofé lé z’ot ».

Mon vié kamarad lété bien rézonab, mé domaz li la kite anou tro bonèr akoz li nora vi, koméla é pou lavnir, i fo arsikl bann matérièl fatigué pou argingn zafèr nèv san détrui la natir, san gaspiy plisk’i n’anfo. Koman nou va fé kan bann métal, pétrol, épi tout sak i apèl matièr promièr sar shèr vèy pa koman ; pli pir talèr si na pi afors bann gran péi i pran tout pou zot. Dann déssèrtin péi, i gingn arsikl ziska soisante pou san bann déshé, épi la pa bann péi pov : sa dan la Suisse, i fé sa. Akoz ni fé pa konmsa ? Mié k’sa si lé possib ! Mi kroi nou nora poin pou argrété, moman dné an avoir fé lo nèv avèk lo vié. Fransh vérité !

Justin