Mi pans, konm moin zot la antann l’aksidan l’ariv dann l’Itali dsi in pon i travèrs d’apré sak i di dsi in kartyé la vil Gênes, sansa dan lé z’alantour. D’apré sak i di té in gran pon, bien fé, avèk bon matéryèl é toudinkou, in gran bout l’otorout la sort anlèr la bate dann fon. I koné pa ankor si sé lo pon la pran l’shok firamézir é afors kanté kanté la fini pa ariv sak l’arivé. Pétète a fors sho-fré, sho-fré lo zafèr la pèrd son lastisité é avèk lo tan la provok in katastof. In pé i di sé par bann sékous sismik. Anfin kozé sé kozé mé kan sa i ariv, l’èrla i tonm tro tar pou di : « A ! Si nou té i koné ! » . Tro tar mounoir pou drèss kabaré !

Mi souvien néna kék z’ané, dann tann siklone moin té apré louk la télé é toudinkou san di arien pèrsone lo pon dsi la rivyèr an sortann Sin-Lui la tonb konm in shato d’kart. Bann plak la gliss inn dsi l’ot épi la bate dann fon lo total é lo kapital. Parl fète, moin la pa koni kosa bann tète koko fromaz la di d’sa mé té blizé arfé in n’ot pon é la mète dé z’ané é dé z’ané pou sa. Lo pli drol sé ké bann vyé pil do pon in sèrtin mésyé Dupont l’avé fé néna bien lontan an réspéktan son bann vyé prinsip la rèss an plas. Kosa ! Zot i domann amoin kosa mi vé dir par-la ? Mi vé pa di arien mé mi di sa konmsa.

Konm sak mi pans san dir kan mi rogard la rout an mèr avèk son bann pil an béton i doi d’apré sak i di siport lo NRL-la rout an mèr. Va fini i fini ar pa ? Sa sé in késtyon mé va tienbo i tienbo ar pa ? Sa sé in n’ot késtyon. Antansyon moin la pa dovinèr, é moin la poin dann mon tète tout bann z’algoritm bann z’inzényèr i ansèrv pou fé z’ot kalkil. Moin na poin non pli léspri avangardist. Mi koné solman in n’afèr : in sinp rokomandasyon bann saz i di klima i réshof donk fé pa tro granshoz bord mèr. Mi koné osi sak i apèl Tsunami, tranblomann tèr siklone épi touti-kwanti. Konm di lo knot : ki vivra véra !

Dann tan néna bien lontan l’avé bann politik lété pa tro kiltivé mèm si zot lété malin.L’avé inn dann sid la-ba, té i koz toultan an parabol é son bann kozman té i lèss bann z’otorité dann l’indivi pars boudikont zot téi domann kosa lo ga téi vé dir ozis. Sé konmsa k’in zour, li la larg lo préfé kozman moin la mark an-o la. D’apré sak moin la konète lo boug téi réklam in pon pou son komine, é konm téi di ali toultan la rivyèr, la rivyèr, li la fini par dir alon fé lo pon épi nou va diskite apré dsi la késtyonn rivyèr.

Alé ! Fé lo pon, la rivyèr va vni apré. Anvoyé Férèr !