Mi sort in Konseyi Lékol ; an fas de moin, in madame responsab paran « Komité d paran tèl Ekol ».
El i di él la mar, él i rotrouv a él toultan tousèl po rorganiz tout…
Na 4 tran dsa, amoin prézidan FCPE (Fédérasyon Konseyi Paran dElèv), prézidan in lasosyasyon lékol primèr… Mi propoz lo minm madame : « voila, moin na in zanfan i rant o kolèz ; moin nora le kolèz po okipé ; mi vé pas la min la prézidans. Lasosiasyon : voila lé kont, in asanblé zénéral ordinèr, sanzman dbiro ; lasosiasyon lé touzour fédéré FCPE ; in travayi 4 an i kontini.
- A non, ti konpran, ton asosiasyon sé konm ton nanfan, sé toué ke la kréé sa ; mi préfèr rouv ma propr asosiasyon… »

Sé sak él la fé ; astèr, na dé zasosasyon ; na konkirans, lo diréktèr osi i zou son zé ; baz su laparans ; tou bo tou nouvo.
Zordi, madame i di él lé fatigè ; tout i ropoz si él dan son Komitéd paran …
Kan moin lavé di FCPE i fédèr paran dépi matérnèl ziska lisé…
La pri a moin po in… kouiyon.

Nou té dan inn dinamik… laik, proksimité ; lo mèr té koné a nou, zinspéktèr té koné a nou ; réktora té koné a nou.
Moin té i di : « si i fo ékri o minis nou pé ékrir ; nout réyoneman isava partou ».
Nout poi politik té i permé a nou alé partou, tout nivo.
Sa paran té bien konsian.

Ek out ti komité lokal, ou kal la minm ; ou réss si la méri ! Domin ton zanfan i rant kolèz, out responsab sé lo konséy zénéral, out zanfan i rant lisé 4an aprè, out référan sé lo konsey rézional !
Sak foi, ti arkomans fé ton komité d paran !
Fé linion dé lo dépar, ti sra pli for, toultan !

 Justin