Oté

« Fé pa l’dégouté kan ou néna bon ri-kalkil in pé si ou l’avé poin ditou ! »

In kozman pou la rout

Justin / 7 out 2020

JPEG - 43.6 ko

Médam zé Mésyé, la sosyété, koz èk moin sé koz èk in kouyon. Mé sé o pyé d’lo mir k’i oi lo bon mason… Zistoir mi sa rakont azot zordi i romont dann tan mon papa lété pti. Dann tan lo moun téi manz plis mayi ké do ri. Donk in soir li té pini pou in loson dsi Zane d’Ark li la pa vouli aprann… Ariv lo soir, l’èr manzé li té touzour an trant sis. Mon gran-Mèr l’avé mète dori o fé mé mon papa i di : « Mi manz pa mayi ! Mi manz pa mayi ! ». Gran-pèr avèk gran-mèr i sèye rézone ali, pène pèrdi. Li manz pa mayi ! li manz pa mayi ! Momandoné li la gingn dé klak, inn dsi la zou gosh avèk gran-mèr, inn dsi la zou droit avèk Gran-pèr. Apré li la manz vite épi li la di : « Mi vé ankor ! Mi vé ankor ! » é li la ramass ankor dé tapin… Aprésa, d’apré sak li di, tout la rotonm dan l’ord konm sa i spass dabitid pou bann zanfan kan zot i fé kapris… Alé ! Ni arète avèk sa é ni artrouv pli d’van. Sipétadyé !