Médam zé méssyé, la sossyété koz èk mwin sé koz èk in kouyon, mé sé o pyé d’lo mir k’i oi lo masson.

Mézami mi panss zot i rapèl kossa lété in patin d’mézon ? Sa téi ansèrv pou fé bril lo sol kan té fine pass l’ankostik. Mé alon rode in pé lo sans figuiré é sé in n’ote kozman k’i done anou lo sans é sé lo kozman i di konmsa : « anserv demoue konm shifon d’pyé » .

Sa i vé dir trète demoune san ménazman ni pé mèm dir san konsidérassion. Zot i koné,dann noute sossyété, néna d’moune i trète lé zot an prékossion, mé d’ote i trète demoune konm l’arivé si tèlman lo moune lé riskab d’ète mortifyé.

Mé pétète zot mèm demoune la fine maltrète azot é sirman sa l’amenn azot pou rofkléshi dsi kozman-la. Astèr ni rotrouv pli dvan, sipétadyé.