San trouv in réponss valab bien antandi, mé avèk lo rèv dan la tète in zour fé roviv bann zoizo-la shé nou, dann noute natir in zour pars néna ankor sa dann plizyèr péi. Mi rapèl mwin la panss sa galman kan mwin la parti la mare poul dolo é mwin la vi l’avé pi d’poul dolo dann la mar - la mèm si lété fine bien dégajé par rapor bann nénifar.. Mwin l’avé in gran rogré mé in gran léspoir in zour nora bann bone volonté pou fé roviv bann poul dolo shé nou La Rényon.

Mé néna dé foi sé léspèss mèm la fine disparète an tan k’léspèss. Sé lo ka bann dodo dann lil Moris, sansa bann dronte La Rényon osinonsa dann Rodrigue… antanssion, mi koné bien la vitèss la syanss i avanss, lé possib fé roviv bann léspèss dispari. Avèk lo koméraz l’adn, son sékanzaz, étsétéra, épi lo kroizman déssèrtin zanimo in pé famiye avèk sak la dispari, mwin lé sirésèrtin avèk in bon kantité milyon l’éro épi bann syantifik éspérimanté, v’ariv a fé roviv bann zéspèss dispari.

Zot va dir amwin noré té pli fassil évite fé mor azot plito ké fé roviv azot zordi, mé mazine in kou la kantité késtyon i pé poz la dsi. Par égzanp si lé itil fé sa, si zot néna ankor in bon rol pou zoué, si la natir èl mèm va akèye azot gran kèr, épi dépanss kantité milyon pou sa. Arienk sa l’assé pou nou poze anou késtyon, mé konm i di shakinn i oi midi dsi son prop révèye.

I paré gouvèrnman Maurice lé pou sa li mé pou kossa ? Pou mète ali dann in kaj épi fé pèye demoune pou rogardé ? Sansa rofé in koin d’natir pou akèye azot bien konm k’i fo. Mézami mi arète tèrla pou l’instan, mé shakinn rantre nou i pé intéroz ali la dsi é mi invte azot à fé travaye zot tète la dsi é ni rotrouv anou pou diskite dé sa.

A bon antandèr, salu !

Justin