Mézami, zot i koné biltin éskolèr-la, sa sé in lokazyon pou déssèrtin amontrèr défoulé. Donk si dann lo trimèste ou la fé out tète piosh avèk zot, ou lé sir-étan zélèv - gingn in bon kozman dsi oute biltin arzouté avèk kozman out paran i sar mète ou... Sé konmsa k’in zour in dalon la gingn in biltin é in amontrèr l’avé mark dessu kozman min la mark an-o la : « fait ce qu’il peut mais peut peu. »

A bien rofléshir, issi la Rényon é dann la makroni an zénéral, sé in kozman i pé aplik in bonpé d’moun, in bonpé l’administrasyon. Issi, la Rényon, mi oi bien l’ARS in kozman konmsa i pé mérite ali pou lé dé zépidémi apré fé mal anou koméla, é dopi in boute tan... In légzanp : la deng. So matin la radio la fé pass in doktorèss é la dmand aèl kossa èl i panss la fasson l’ARS i amenn la lite kont maladi-la.

Ala kossa lo madam la réponde : solon èl l’ARS i di él i fé toute sak i fo fèr. Lo zoinalist la domand : Kossa èl i fé oziss ? lo médsin la répond, - èl i koné pa pars l’ars la pa tro transparan dann son laktivité. Apré èl lazoute èl lé konm toute demoun, èl i oi lo bann shif lé pa bon, mèm si tazantan èl i oi in laksyon kominikasyon. Pétète i f apèl sa inlaksyon boush-lo–zyé.

Na poin pliss pou dirké la lite kont moustik i patine dopi in sèrtin tan é la maladi i marsh dsu nou-i diré èl i gagn di térin. Alor kossa mi anpanss mèm si mon lopinyon la pa pli inportan k’i fodré ? Mi anpanss sak mwin la mark an-o la : « Fé sak li gingn mé li pé pa gran shoz. »-Fait ce qu’elle peut mais peut peu.