Médame, zé méssyé, la sossyété koz èk mwin sé koz èk in kouyon mé sé o pyé d’lo mir k’i oi lo masson.

Mézami mi rapèl mwin la antande sa dann in zistoir kréol. Lo éro téi apèl Laramé é li la ansèrv manèv Bondyé dann in tour di mond. Bondyé la fé bonpé mirak mé li la di son sèrvitèr la fraz mwin la marke an-o la. Mé nout éro la pa ékoute sonn mètr é pli d’in foi li la rète pri konm zoizo dsu la kol — Bondyé té blizé sokour ali. Mé li la rokomanss sa pli d’in foi si tèlman son tète té dir.

Astèr mwin néna in n’ot légzanp é sa téi éspass dann la lite rante pro-kréol é kont-kréol. In kont-kréol la di : in pé — bande pro-kréol — i vé mète kréol lékol mé zot kaz zot i parl franssé avèk zot zanfan. Na poin lontan mwin la antande ankor in moune poz sa Prézidan lofis la lang, Axel Gauvin, é sa la spass dann télé. Biensir Axel la ranvoye ali dan sé kord mé sé pou dir azot kan ou lé kouyon sé pou la vi é pli pir, zénérassion an zénérassion.

Alé ! Mi kite azot rofléshi la dsi é ni rotrouv pli d’van. Sipétadyé.

Justin

NB — Mi sava pa rakonte azot lo zistoir laramé an gran mé zot i pé trouv sa, d’apré mwin, dann nout zoinal Témoignages. Alor si lo kèr vou-zan-di, zot i pé alé lir ali si zot i vé é lo téknik lé sinp.