Médame méssyé, la sossyété koze èk mwin sé koze èk in kouyon, mé sé o pyé d’lo mir k’i oi lo masson.

Mézami, mwin lé sirésèrtin zot toute i koné kozman-la. Mi supoz okin rolijyon va inskri rokomandassyon-la an parmi son bande komandman. Mi rapèl in zistoir Laramé, kan Bondyé i di ali : Fé sak mi di aou fé, mé fé pa sak mi fé. Kaziman lo kozman mwin la marke an-o la, mé Laramé tète dir i ékoute pa Bondyé é i ariv ali toute sorte kanikrosh-demoune la mèm manke tyé ali, Alor zot i oi konm l’afèr i pé ète sèryé. I fo dire dann lo zistoir Bondyé la fé mirak alor lé sir Laramé l’avé poin pou fé bande mirak-la.

Solman zistoir sé zistoir, la zamé été in n’afèr sèryé, alor i fo pa pran o sèryé sak lé pa é sak lé ziss pou fé dor zanfan an intéréssan azot in pti pé ziska somèye i pèze azot atèr… Pou mwin kozman-la lé assé ipokrite. A mwins ké mi konpran pa bien lo provèrb, mé mwin néna konm linpréssyon la moral i pé pa aksèpte in n’afèr konmsa. Antouléka sé in kozman é ni pé rofléshi la dsi. Alé ! Mi kite zote majinassion mouliné é ni roytrouv pli d’van. Sipétadyé.

Proverb Haïti : Wè ça mfè ; pa fè ça mfè : Regarde ce que je fais ; ne fais pas ce que je fais