Yèr, nou la di pétrol sar plizanpli rar. Pou komansé, son pri va goumanté : 100 euro, 150 euro. Pèrsone i koné pa ziska kèl otèr lo pri va grinpé. Alor, koman nou va fé avèk tout so bann péi pli gran, pli rish lapré tash moiyin kapar tout pou zot ?

Kan ou lé dann leurop, kisoi l’itali, l’éspagn, épi d’ot ankor, wa ashté kouran avèk bann péi européin. Nora mèm pa bézoin sote la mèr. Vik’tout lo rézo sar konékté inn avèk l’ot. Alor la poin pou afolé si lizine kouran lé in pé an difikilté. In péi i ashté avèk in n’ot ; in sosiété i ashté avèk in n’ot. Mé nou, koman nou va fé ?

Mi antan déza d’isi bann moun tandans mandian va di : Kas pa la tète, lédéèf i mazine anou ! Ali mèm va ashté pétrol épi va amène sa issi. Dizon pou la santral tèrmik, zot i vé fé dann Por ! Zot ossi zot i kalkil konmsa ? La pa vré ! Zot la fine bliyé nout plan pou lotonomi dann lénèrzi ? Sansa zot i fyé déssi baton tonton pou travèrs la rivièr.

La, sé konm k’i diré rod boubou pou nout kor : kont déssi lé z’ot, olèrk kont déssi nou-mèm an promié. An kontrèr, sak i fo sé fé sak nou lé kapab ! Sa mèm nout shomin galizé !

Justin