Oté

« Fé sak ou néna pou fèr, mé fé ali avèk la joi dann kèr ! »

In kozman pou la rout

Justin / 16 zwiyé 2019

JPEG - 43.6 ko

Mésyé, Médam, la sosyété, lèss amoin rakont azot in listoir réaksyonèr. Réaksyonèr ? Oui, pars pou moin néna poin d’ot mo pou di sa. Sa sé sak moin la vi dann in fime tourné laba dann l’amérik. L’avé dann tan-la in famiy avèk lo mésyé néna in bon travaye, lo madam i okip son ménaz, épi troi zanfan, inn andikapé dan la bann. Lo madam i arète pa plégné akoz in bonpé travaye téi tonm dsi èl : ménaz-li, lékol marmaye-li, lo soin tout la bann, lavaz, ropasaz é tout lo tranbléman. Si tèlman k’in zour èl la désid lité pou lo légalité rant fanm é bononm. L’avé in madam téi vanj pou sa é kan èl la pass dann l’androi la famiy té i rèss, lo momon la baré pou alé amenn la lite avèk lo madam. Baré ? Mi di azot é dann l’amérik kan ou la baré sé pa pou rèss s tèrla, mé pou alé loin. Lo momon parti, lo bononm épi lo bann marmaye la roganiz azot pou ranplas lo momon, dann la bone imèr. Tout la donn ko u d’min inn a l’ot épi kan sis moi la pasé lo momon la rovni èl la vi tout téi roul ron. Tout té fé konm k’i fo épi dann la zoi é la bone imèr. Kan lo momon la dmann koman kosa la éspasé zot la éspliké : lèrla lo momon té a d’mandé si èl té i doi résté, sansa kol shomin in n’ot kou. Alé ! Mi arète la épi mi kite azot rofléshi la dsi-dsi sak moin la mark an-o la é dsi la filozofi lo fime moin l’apèl réaksyonèr é ni artrouv pli d’van. Sipétadyé !