Mézami mwin la antande dann télé in patron lantroprize lalimantassion lété invité pou koze dsi in sizé k’i intérèss in bonpé patron, in bonpé zoinalist, é d’apré sak mwin la antandi téi parl lo manke travayèr pou travaye dann bande métyé lalimantassion. A romarké lo salère si lé fèb pou zot la pa in problèm, si lo bande kondission d’travaye lé pa korèk, toussala lé pa inportan. Linportan sé lo manke travayèr a s’ki paré dann bande proféssion-la.

Donk la poze lo patron in késtyon dsi zot dada a zot é oila ké lo méssyé i di, li néna in kolèg boulanzé é lo kolèg i trouv pa zouvriyé boulanzé pou travaye : i paré i shèrch, i shèrch épi i trouv pa, alor li la di avè lo patron boulanzé, pétète i fo fé in apèl dsi lo plan nassyonal. Donk si zot i konpran amwin bien, pi bézoin rode travayèr rényoné, rode travayèr déor.

Mi koné pa kossa zot i anpanss de sa, mé mwin kan i komanss di zafèr konmsa mi panss l’apré sharj de lo : alor in moune va sorte laba dan La Franss pou travaye issi La Rényon, pou fé issi lo même métyé k’i fé laba é pou sibir pétète(!) in lésploitassion pli for ké laba. Alor, bande travayèr rényoné formé é diplomé, va désside pa travaye épi toush l’assedic dégréssif. Alé dodo don ! I wa pa sa sé in n’afèr k’i kol pa é k’i ansèrv arink a défande lidéolozi patronal, mèm kolonyal.