Oté

Fé zorey koshon dann marmit poi

Vanessa / 13 mars 2019

JPEG - 43.6 ko

Akoz sak foi mi lèv la tét, mon zorey lé dann dezaroi. Zot la remark in nafer : le touzour le minm kalité demoun, i fe dezord, i kas tinpan, i brouy lo sérénité ou la tash manier travay depui gran matin ? 

Kel kalité demoun zot va demann amoin ? Wope ! Zot minm, fé léspérians, in loto ek la mizik boumboum, tansi le mizik koupab, lé « aou koman ou ral sa ou ? », lev la tét, gardé. Kisa i lé ? Kan le soir, kalkil pa inn fin d semen, non, dann milie, akoz kalandrié i mars pa pou se kalité demoun, zour travayé, kone pa, rouv zot zekoutiy, ékouté .

Ou sava kisoi bord mer kisoi bordaz la rivièr, minm kan ou sar trap marmay lekol, loto bordé, zot lé la minm. Andiré banna i suiv aou, aou finaldekont ou i fui dezord, ou i rod an dezespoir in fanal silans la natir. Zot i voi kosa mi ve dir ? Zot i antann se bann kas zorey demoun ? Mi ve pa dir i fo pa ékout la mizik, mi ve pa di i fo aret viv, soman gramoun la toujou di « viv an respé », an respé po ou, pou lezot. 

Marmay, asé ékout la mizik i obliz mét grin tamarin dann zorey, asé asét zanpli i fé pét la mizik kan ou sort an parti, kinm néna de troi moun an brinzel. Asé fé dézord siouplé, akoz ek tousala, in lespresion reioné va disparet : « fé zorey koshon dann marmit poi ». Wopé bon dimans, an silans. Alor, mi invite azot rofléshi la dsi é ni artrouv pli d’van. Sipétadyé !

Vanessa