Kanar i ponn do zèf, kaïman galman mé konm zot i koné néna poin lo mèm zanimo dann in kalité d’zèf épi dan l’ot. Moin la lir in provèrb malgash téi di konmsa : fémèl kanar, kouv lo zèf Kaïman é an rotour ou va gingn lo droi ansèrv lo marigo. Kosa sa vé dir par l’fète ? Sa i vé dir ou i pé asosyé avèk out z’ènmi si sé in l’asosyasyon gagnan – gagnan. Dann listoir zot i souvien lo pakt zèrmano-sovyétik. Pli tèr-a-tèr néna bann zalyans pou zéléksyon, mé moin pèrsonèl si mi konpran l’alyansman dé parti néna in l’intéré an komin pou in bout tan, mi ariv pa konprann in l’alyansman avèk inn i vé absoliman manz lo foi l’ot é vèrsi-vèrsa. Poitan sa i ariv, alor dann désèrtin ka i fo fèr mé avèk méfyans pars domin kaïman va manz ti kanar é pti kanar i gingn ar pa zamé manz kaïman. Arzout èk sa kan désèrtin na poin réspé pou la parol doné é konm i di, si ou i sign in marshé sé pou fé fout aou d’dan. Alé ! Mi kite azot rofléshi la dsi é ni artrouv pli d’van. Sipétadyé !