Médam, zé Méssyé, la sosyété, koze èk mwin sé konmsi wi koze avèk in kouyon, mé sé o pyé d’lo mir wi pé oir lo masson. Mézami, si zot i lir bien sak mwin la mark an-o la, zot va konprann toutsuite la pa in kozman kréol rényoné, mé in kalité kozman wi pé antann partou oussa wi sava donk wi pé antann ali issi La Rényon-pars bann rényoné i mank pa fé lo filozof tazantan. Ni pouré dir la pa la kouyoniss i fé rokil la kouyoniss mé lintélizans i yinbou. Avèk lo tan. Pou koué mi di avèk lo tan ? Pars d’apré sak moin la romarké, in kouyonis i pass souvan défoi konm in lète a la post é apré konm i di dan la shanson, « kour déyèr an atandan ». In bétiz i aparé souvan konm in vérité absolu, é pou démonté i fo wi argumante, wi argumante ankor é pou finir, si ou néna rézon wi gagn : la limyèr i gingn son konba kont lo fénoir, lintélizans i gagn son konba konte la bétiz, mé avèk lo tan. Alé ! Mi kite azot rofléshi la dsi é ni artrouv pli d’van. Sipétadyé.